𝐀𝐲𝐢𝐭𝐢 – 𝐄𝐥𝐞𝐤𝐬𝐲𝐨𝐧 : 𝐊𝐄𝐏 𝐚 𝐫𝐞𝐥𝐚𝐧𝐬𝐞 𝐦𝐚𝐜𝐡𝐢𝐧 𝐞𝐥𝐞𝐤𝐭𝐨𝐫𝐚𝐥 𝐥𝐚 𝐚𝐤 𝐩𝐫𝐞𝐩𝐚𝐫𝐚𝐬𝐲𝐨𝐧 𝐲𝐨𝐧 𝐧𝐨𝐮𝐯𝐨 𝐝𝐞𝐤𝐫è

𝐀𝐲𝐢𝐭𝐢 – 𝐄𝐥𝐞𝐤𝐬𝐲𝐨𝐧 : 𝐊𝐄𝐏 𝐚 𝐫𝐞𝐥𝐚𝐧𝐬𝐞 𝐦𝐚𝐜𝐡𝐢𝐧 𝐞𝐥𝐞𝐤𝐭𝐨𝐫𝐚𝐥 𝐥𝐚 𝐚𝐤 𝐩𝐫𝐞𝐩𝐚𝐫𝐚𝐬𝐲𝐨𝐧 𝐲𝐨𝐧 𝐧𝐨𝐮𝐯𝐨 𝐝𝐞𝐤𝐫è

Pòtoprens, 19 oktòb 2025 — Yon nouvo etap ouvè pou enstitisyon elektoral ayisyen an. San li pa kòmanse depi nan zewo, Konsèy Elektoral Pwovizwa (KEP) anonse nan kòmansman semèn nan lansman travay pou prepare yon nouvo dekrè elektoral, ki se dokiman legal ki nesesè pou òganize pwochen eleksyon yo nan peyi a.

Desizyon pou mete sou pye nouvo dekrè sa a vin nesesè apre Konsèy Prezidansyèl Tranzisyon (KEP) te deside anile pwojè referandòm konstitisyonèl la. Sa vle di eleksyon k ap vini yo ap fèt dapre Konstitisyon 1987 lan, ki toujou an vigè, ansanm ak amandman ki te fèt ladan l.

Prezidan KEP a, Jacques Desrosiers, fè konnen teknisyen ak depatman jiridik enstitisyon an deja ap travay sou premye vèsyon dekrè elektoral la. Sepandan, li pa t vle bay okenn dat presi pou fini dokiman an. Li eksplike ke tèks la ap bezwen apwobasyon Prezidans lan anvan nenpòt piblikasyon ofisyèl oswa anons kalandriye elektoral la.

M. Desrosiers demanti rimè ki te di yon kalandriye eleksyon deja prepare pou mwa mas 2026. « Travay la ap fèt, men li twò bonè pou n pale de dat », li te deklare.

San refòm konstitisyonèl, KEP a ap oblije rete nan kad legal ki egziste yo. « Nou pa bezwen envante wou a ankò », dapre M. Desrosiers, ki rekonèt ke pwosedi elektoral yo deja byen konnen pa espesyalis yo. Men, kèk aktè politik mande pou sispann pwosesis la, yo di kondisyon sekirite yo pa pèmèt fè eleksyon avan fen manda KPT a.

Prezidan KEP la, ki parèt pridan nan deklarasyon li yo, chwazi rete sou bò teknik travay la, san l pa antre nan polemik politik. Li fè konnen enstitisyon an deja voye yon kalandriye pwovizwa bay Prezidans lan, nan ka eleksyon ta fèt dapre Konstitisyon 1987 lan.

Toujou selon M. Desrosiers, machin elektoral la deja an mouvman. Apeprè 80% sant vòt yo deja idantifye ak prepare, tandiske 20% ki rete yo sitou nan kèk komin nan depatman Lwès ak Latibonit kote gen kontwòl gang toujou.

Konsènan demann pou fè odit sou fon referandòm ki te anile a, prezidan an fè konnen KEP a pa t sèvi ak okenn lajan dirèk ki te prevwa pou sa. Li eksplike sèlman “basket fund” la, yon fon miltipatnè, te sèvi pou repare ekipman elektoral yo. « Depans referandòm yo te jere pa komite pilotaj la », li te ajoute, pandan li asire ke KEP a pare pou bay tout rapò sou lajan piblik li jere.

An konklizyon, Jacques Desrosiers renouvle angajman KEP a pou òganize eleksyon lib, transparan ak kredib. Li espere nouvo pwosesis sa a ap ede evite nouvo kriz politik epi mete peyi a sou wout estabilite enstitisyonèl li bezwen depi lontan.

Sadrack JANVIER
sage52934@gmail.com